सगरमाथा चढ्ने पहिलो लेबनानी महिला भन्छिन नेपाल नघुमे जीवन सार्थक हुँदैन

SHARE
  •  
  •  
  •  
  •  
  •  
  •  
  •  

यूएई। सगरमाथाको सफल आरोहण गरेकी पहिलो लेबनानी महिला फतिमा डेरयानले जीवनकालमा एक पटक नेपाल नघुमे जीवनको सार्थकता नहुने बताउनु भएको छ ।

नेपाल पर्यटन वर्ष २०२० को उद्घाटन समारोहलाई यूएईमा सम्बोधन गर्दै उहाँले सगरमाथा आरोहणका अनुभव सुनुउनुभयाे।

फतिमाले सगरमाथा चढेको दिन आफूले आफ्नो जीवनकै महत्वपूर्ण क्षण भएको उल्लेख गर्नुभयो । उहाँले नेपालीको मन सगरमाथाजस्तै उचो भएकाले पनि नेपाल घुम्न जान विदेशी समुदायलाई आग्रह गर्नुभयो ।

सगरमाथा चढ्ने बेला शेर्पा दाजुभाइले गरेको सहयोग सम्झँदै कठिन यात्रामा नेपालीहरु कति सहयोगी हुन्छन् भन्ने कुरा त्यतिबेला आफूले बुझेको फतिमाले स्मरण समेत गर्नुभयो । नेपाल घुम्ने बेला सगरमाथाको फेदमा गरेको पूजा र त्यही बेला लगाएको घाँटीको माला देखाउँदै आफूलाई त्यो मालाले शक्ति प्रदान गरिरहेको बताउनुभयो ।

नेपाल पर्यटन वर्षको अवसरमा यूएई सरकारका उच्च पदस्थ अधिकारी तथा यूएईमा रहेका विभिन्न क्षेत्रका विदेशी प्रतिनिधिहरुको उपस्थितिमा नेपाली दूतावास यूएईले मंगलबार साँझ आबुधाबीमा गरेको कार्यक्रमको प्रमुख अतिथिको रुपमा आमन्त्रित फतिमालाई नेपाली दूतावासले सम्मान समेत गरेको थियो ।

कार्यक्रममा यूएईका लागि नेपाली राजदूत कृष्णप्रसाद ढकालले फतिमालाई नेपाली कोसेली तथा चिनोसहित सम्मान पनि गर्नुभयाे ।

नेपाल भ्रमण वर्षको अवसरमा नेपाल पर्यटन बोर्डले निर्माण गरेका वृत्तचित्र, फोटो प्रदर्शनी, सुदूरपश्चिमको छलिया नाच, कुमारी नाचसमेत प्रस्तुत गरिएको थियो । उपस्थित पाहुनालाई नेपाल भ्रमण वर्ष लेखिएका हाते झोलामा नेपाली कोसेलीसमेत प्रदान गरिएको थियो ।

नेपाल भ्रमण वर्षलाई सहयोग पुग्नेगरी आयोजित कार्यक्रममा नेपाल भ्रमण गर्ने लक्षित समुदाय अन्तर्गत विश्वविद्यालय, होटल तथा पर्यटन व्यवसायी, एयरलाइन्स, विदेशी लगानीकर्ता तथा नेपाली समुदायका प्रतिनिधिहरुसमेत गरेर झन्डै एक सय जनाको उपस्थिति थियो ।

गएको मे २२ मा सगरमाथा आरोहण गरेकी २६ वर्षीया अरबी युवती फतिमाले कार्यक्रममा सम्बोधन गरेलगत्तै उहाँलाई बिदेशी पाहुनाले भेटेर नेपाल र सगरमाथा बारे जिज्ञासा राखेका थिए ।

कार्यक्रममा स्थानीय सञ्चारमाध्यमका सम्पादकहरुको समेत सहभागिता थियो । सहभागीका भिजिटिङ कार्डहरुबाट गोला प्रथा गरेर एक जनालाई नेपाल एयरलाइन्सले नेपालको दुईतर्फी हवाई टिकट प्रदान गरेको थियो ।

दूतावासका द्वितीय सचिव भुवन ओझा, श्रम काउन्सिलर भेषबहादुर कार्की, तृतीय सचिव नारायण ज्ञवाली, रामविनय राय, लेखाप्रमुख पुण्यवती पौडेल तथा दूतावासका स्थानीय कर्मचारी र नेपाली समुदायले अन्तर्राष्ट्रिय प्रतिनिधिहरुलाई स्वागत गरिएकाे थियाे ।

-उज्यालो अनलाईन

यो पनि पढ्नुस
उत्पतिसम्बन्धि किम्बदन्ती तथा जनश्रुति

पाथीभरा देवीको उत्पतिसम्बन्धि थुप्रै किम्बदन्ती तथा जनश्रुतिहरू छन । भनिन्छः- परापूर्वकालमा पाथीभरा आसपासका गोठालाहरूले आफ्नो भेडीगोठ पाथीभरामा राखेका थिए । एकदिन अचानक अप्रत्यासित ढंगले देख्दा देख्दै ती गोठका बथानका बथान भेडाहरू अलप भए । त्यस्तो अकल्पनिय घटनाले स्तब्ध तथा हतप्रव भएका गोठालाहरूलाई रातमा देवीले दर्शन दिनु भै आफ्नो उत्पतिस्थल र आकृतिको बोध गराउँदै, भेडा बलिसहित पूजा अर्चना गर्ने निर्देशन दिनुभयो ।

आत्मवोध प्राप्‍त गोठालाहरूले देवीको आकृति उत्पन्न स्थलमा भक्तिभावपूर्वक पूजा अर्चना गरी सबैभन्दा हृष्‍टपुष्‍ट भेडाको थुम्बा बलि दिए । बलि के दिनु थियो ती हराएका सयकडौं भेडाहरू जस्ताको तस्तै पहिलाकै ठाउँमा देखा परे त्यो भन्दा आश्‍चर्यको कुरा, बलि दिएको भेडाको रगत बलिस्थलमा झर्नासाथ बालुवामा पानी हराए झैं हराउन पुग्यो । यो देखेर हर्ष एवं आश्‍चर्य मान्दै गोठालाहरूले देवीको जय जयकार गरे । यहाँ स्मरणीय कुरा के छ भने पाथीभरा देवीलाई दैनिक सयकडौंको संख्यामा भेडा, बोका, पाठीको बलि चढाईन्छ ।

तर बलिस्थलमै रगत हराएको, सीमित रहेको जो कोही दर्शनार्थीले प्रत्यक्ष अनुभव तथा अवलोकन गर्न सक्दछन । देवीमा चढाईएको बलि संख्यालाई दृष्‍टिगत गर्दा यहाँ रगतको पोखरी जम्नु पर्थ्यो तर त्यसो हुँदैन । यसैकारण पनि रक्तकाली देवी पाथीभराले भक्तजनहरूले चढाएको बलि स्‍नेहपूर्वक ग्रहण गर्छिन् भन्‍ने जनधारणा रहि आएको छ । आज पाथीभरा देवीको महिमा, देवीप्रतिको आस्था एवं विश्‍वासले गाँउ, जिल्ला र देशको सीमा नाघ्दै विदेशसम्म पुगेको छ। जसको परिणामस्वरूप हजारौंको संख्यामा श्रद्धालु भक्तजनहरू देश तथा विदेशबाट देवीदर्शनको निम्ति आउने क्रम जारी छ ।

Comments

comments

सम्बन्धित शीर्षकहरु